| Որովայնի շրջանում ցավերը երեխաների մոտ կարող են պարբերական բնույթ ունենալ և շատ արագ անցնել: Որոշ դեպքերում ստամոքսի և որովայնի ցավերը որևէ լուրջ խնդրի մասին են վկայում: |
Ընդհանուր և նորածնային վիրաբուժական ծառայության բժիշկ, մանկական վիրաբույժ Ռոմիկ Սարգսյանը նշում է, որ որովայնի ցավերը, հատկապես, աջ զստային շրջանում՝ կույր աղիքի բորբոքման նախանշաններից են: Եթե երեխան գանգատվում է ցավերից, դրանք սաստկանում և հաճախակի են դառնում, պետք է անհապաղ երեխային տեղափոխել հիվանդանոց։
Կույր աղու որդանման ելունի բորբոքումը՝ ապենդիցիտը, վաղ մանկական տարիքում ավելի քիչ է հանդիպում, ռիսկի խմբում են՝ 6-ից 12 տարեկան երեխաները, որոնց մոտ առավել հաճախ դիտվում է սուր ապենդիցիտ՝ բուռն ընթացքով և բարդությունների արագ զարգացումով:
Առավել արտահայտված ախտանշանները
- որովայնի ցավ, ինչը կարող է ուժեղանալ կամ նվազել, սակայն ամբողջությամբ չանցնել,
- սրտխառնոց, փսխում,
- ջերմության բարձրացում:
Վերը նշված գանգատների առկայության դեպքում անհրաժեշտ է
- շտապ դիմել մանկական վիրաբույժի,
- կատարել հետազոտություններ:
- եթե հաստատվում է սուր ապենդիցիտ, ցուցվում է վիրահատություն՝ շտապ կարգով:
Որդանման ելունը բուռն ընթացող բորբոքման արդյունքում ենթարկվում է դեստրուկցիայի (քայքայման), որի արդյունքում զարգանում են երեխայի առողջությանն ու կյանքին սպառնացող բարդություններ՝ պերիտոնիտ (երբ թարախով լցվում է որովայնի խոռոչը), ապենդիկուլյար աբսցեսներ, ապենդիկուլյար ինֆիլտրատ, աղիների անանցանելիություն, ծանր ինտոքսիկացիա, սեպսիս և այլն։
«Մուրացան» համալսարանական հիվանդանոցում վիրահատությունն իրականացվում է հիմնականում լապարոսկոպիկ եղանակով:
Առավելություններն են՝
- քիչ տրավմատիկ է,
- հետվիրահատական վերքի թարախակալում և ճողվածքներ չեն զարգանում,
- սպիներ գրեթե չեն մնում,
- ախտորոշիչ նշանակություն ունի՝ հնարավոր է ներսից զննել որովայնի ամբողջ խոռոչը և գնահատել ախտահարման տարածվածությունը, օրգանների վիճակը, իրականացնել որովայնի խոռոչի բոլոր բաժինների սանացիա, հայտնաբերել հարակից այլ պաթոլոգիաներ և այլն։
Եթե երեխան ունի որովայնի ցավեր, ՉԻ ԿԱՐԵԼԻ
- ցավազրկողներ կամ հակաբորբոքայիններ տալ,
- կիրառել ժողովրդական մեթոդներ՝ զբաղվել ինքնաբուժմամբ, քանի որ այդ ամենը մեծացնում է բարդությունների հավանականությունը, թույլ չի տալիս ժամանակին ախտորոշել, առաջացնում է հավելյալ բարդություններ:
Հիշե՛ք՝ հիվանդության վաղ հայտնաբերումն արդյունավետ բուժման հիմնական գրավականն է: