Մանկական վիրաբուժական հիվանդությունների համալսարանական կլինիկայի թիմին միացել են փորձառու մասնագետներ` կրծքային վիրաբույժ, Մանկական վիրաբուժության ամբիոնի դոցենտ, ՀՀ ԱՆ մանկական վիրաբուժության գծով գլխավոր խորհրդատու Դավիթ Դալլաքյանը, կրծքային վիրաբույժ Արտակ Գևորգյանը, անեսթեզիոլոգ Լուսինե Մելքումյանը, անեսթեզիոլոգ, ԵՊԲՀ անեսթեզիոլոգիայի և ինտենսիվ թերապիայի ամբիոնի ավագ դասախոս Միքայել Շաքարյանը։
Թիմին միանալու առաջին իսկ ամսվա ընթացքում պատրաստակամության և նոր աշխատավայրում ջերմ ընդունելության շնորհիվ, մասնագետները շատ կարճ ժամանակում կարողացել են լիարժեք ինտեգրվել աշխատանքային միջավայրին և իրականացնել մի շարք բարդ վիրահատություններ։
Կատարված աշխատանքների թվում են ՝
- Թոքի ատիպիկ մասնահատում թորակոսկոպիկ ճանապարհով 2 ամսական երեխայի մոտ
- Լապարոսկոպիկ պիլորոմիոտոմիա 25 oրական երեխայի մոտ
- Թոքի պատռված էխինոկոկկի հեռացում թորակոտոմիայի միջոցով
- Կրծքավանդակի ձագարաձև դեֆորմացիայի շտկում
- Դեստրուկտիվ թոքաբորբի համար թորակոսկոպիկ վիրահատություն
- Թոքի թարախակույտի ՈՒՁՀ հսկողությամբ դատարկում
- Հիրշպռունգի հիվանդության ռադիկալ վիրահատություն (De la Torre — Mondragon)
- Աջակողմյան ստոծանիական ճողվածքի պլաստիկա սինթեթիկ նյութով 1700գ նորածնի մոտ
- Ձախից ստոծանու ռելաքսացիա, ստամոսքի ոլորապտույտով 1 ամսական երեխայի մոտ (ծայրահեղ հազվագյուտ հանդիպող արատ)
- Շնչուղիների օտար մարմինների հերացում
- 20-ից ավելի կերակրափողի, բրոնխների և կոկորդի նեղացումների դիլատացիա:
Ծառայության զարգացման նոր փուլը դեռ առջևում է, իսկ թիմի համալրումն արդեն իսկ նպաստում է մանկական վիրաբուժական օգնության որակի բարձրացմանը։
