|
  • Русский
  • English

Մուկովիսցիդոզի կենտրոն «Մուրացան»-ում

«Մուրացան» համալսարանական հիվանդանոցում  գործում է Մուկովիսցիդոզի կենտրոն։

Ենթաստամոքսային գեղձի կիստոզ ֆիբրոզը կամ մուկովսիցիդոզը հազվադեպ գենետիկ հիվանդություն է, որը հիմնականում ախտահարում է շնչառական համակարգը, մասնավորապես հարքթային խոռոչները ու թոքերը, ստամոքսաղիքային համակարգը։

Մանկաբուժության թիվ 1 ամբիոնի դասախոս, Մանկաբուժության թիվ 1 կլինիկայի մանկաբույժ Սաթենիկ Հարությունյանը նշում է, որ վերջին տասնամյակների ընթացքում հիվանդության մասին պատկերացումները էական փոփոխվել են ՝ մուկովիսցիդոզը դարձել է կառավարելի, երբեմն նաև բուժվող հիվանդություն,  այն ախտորոշվում է նաև հասուն տարիքում,  ի հայտ է եկել մեծահասակների մուկովիսցիդոզ տերմինը։

2006թ.  ՀՀ առողջապահության նախարարի հրամանով համալսարանական մանկական կլինիկայում ստեղծվեց մուկովիսցիդոզի դիսպանսեր կենտրոնը՝ հանրապետության ողջ բնակչությանը սպասարկելու գործառույթով։

Ստեղծման օրվանից կենտրոնն ակտիվ համագործակցում է ՌԴ և Եվրոպական շատ երկրների մուկովիսցիդոզի կենտրոնների և միությունների, հիվանդների և ծնողական եվրոպական ասոցիացիաների հետ։

2017թ. կենտրոնն անդամակցում է Եվրոպայի Մուկովիսցիդոզի միության պացիենտների ռեգիստրին։

Մուկովիսցիդոզի կենտրոնի մասնագետները վերապատրաստվել են ՌԴ, Եվրոպայի առաջատար մուկովիսցիդոզի և Թոքաբանության կլինիկաներում, մասնակցում են համագումարների և համաժողովների,  մասնագիտական հանդիպումների և քննարկումների։ Կենտրոնի կողմից հրատարակվել են ուղեցույցներ բժշկական հանրության համար։

Նշենք, որ մուկովիսցիդոզը հիվանդություն է, որի ժամանակին և ճիշտ ախտորոշումը էական փոխում է այս ծանր, բայց միևնույն ժամանակ արդեն կառավարելի հիվանդության ընթացքը։

Եվ այսպես, ինչ կլինիկական նշանների դեպքում կարող է բժիշկը ուղղորդել մուկովիսցիդոզի կենտրոն  կամ հրավիրել մուկովսիցդոզի  խորհրդատու մասնագետ՝

  • Նորածնի առաջնային կղանքի՝ մեկոնիումի ուշացած հեռացում, դրա հեռացման դժվարեցում՝ ուղեկցվող փորափքանքով, փսխումներով (ավելի քան 48 ժամ),
  • նորածնի երկարատև ավելի քան 14 օր տևող դեղնուկ, որն ուղեկցվում է կղանքի անգունացումով, մեզի մգացումով և եթե արյան մեջ հայտնաբերվում է բլիրուբինի ուղղակի բաժնի շատացում,
  • նորածնի, կրծքի հասակի երեխաների փսխումներ, ջրազրկում, հրաժարում ուտելուց՝ ուղեկցվող արյան մեջ նատրիումի, կալիումի, քլորի քանակի նվազումով՝ այլ պատճառների բացառման պարագայում,
  • ձգձգվող և քրոնիկ լուծ, որն ուղեկցվում է քաշի վատ ավելացումով, անմարս, յուղոտ կղանքով, ուղիղ աղիքի արտանկումով,
  • քաշի անբավարարություն, հատկապես աղիքային նշանների դեպքում,
  • երկարատև կպչուն հազով, աղմկոտ շնչառությունով կրկնվող, ձգձգվող, մեծ մասամբ ծանր ընթացքով շնչառական վարակներ, ախտորոշմանը չենթարկվող ասթմա, ավագ հասակի երեխաների շրջանում՝ քթի ծոցերի քրոնիկ թարախային բորբոքում, պոլիպներ,
  • ենթաստամոքսային գեղձի կրկնվող բորբոքումներ,
  • առաջնային շաքարային դիաբետ կրկնվող կամ քրոնիկ շնչառական գանգատներով։

Մուկովիսցիդոզ ախտորոշումը կասկածելի է  նաև մեծահասակների շրջանում եթե առկա են՝

  • քթի ծոցերի քրոնիկ, բուժմանը կայուն բորբոքում,
  • տարածուն բրոնխաէկտազներ կոմպյուտերային տոմոգրաֆիկ հետազոտությունով, որոնք ախտորոշվում են որպես «իդիոպաթիկ բրոնխաէկտազներ»,
  • տղամարդկանց ամլություն, հատկապես ուղեկցվող քրոնիկ շնչառական գանգատներով, շաքարային դիաբետով

Խորհրդատվության համար դիմել`

«Մուրացան» համալսարանական հիվանդանոց,

Մուկովիսցիդոզի կենտրոն

Հասցե՝ Մուրացան 114

Հեռ։ 094244906, 010453302

Ինչպես կարող ենք ձեզ օգնել